CPHIMS (Certified Professional in Healthcare Information and Management Systems)
كل ما تود معرفته عن شهادة ال
CPHIMS
ومجال الhealthcare information technology
كل المعلومات اللى محتاج تعرفها جمعناها واتكلمنا عنها في ال Live session في الفيديو ده
10 أسباب ليه ممكن تفكر في شهادة الـ CPHIMS لو حابب تستثمر في نفسك في مجال وخبرة جديدة واعدة:
1. قوة الشهادة واعتمادها:
قوة الشهادة أولا بتيجي من مانحها ... ممكن تاخد محتوى عظيم ومنهج اخر 3 حاجات لكن معتمد من المركز الثقافي الرواندي او حاجة زي المركز الالمانى لتغليف وطباعة الشهادات الفيك .. ولا حاجة ....لا اعتماد لا مصداقية لا انتشار لا شيء .
في حالة شهادة الـ CPHIMS الموضوع مختلف تماما . هنا الجهة المانحة هي الHIMSS وثانية واحدة بس ركز كدة واتعدل وانا بكلمك عن ال HIMSS . انت بتتكلم عن منظمة اعضاءها عدوا ال110 الف مع 480 شريك ومؤسسات مختلفة بتشتغل مع بعض عشان تتطور مجال الـhealth informatics على مستوى الكوكب ده غير انه المسؤول عن قصة الEMRAM واللى هنتكلم عليها كمان شوية فلما الHIMSS تقولك خد الشهادة دي يبقى تاخدها وانت مطمن.
2. الشهادة ومستقبل الرعاية الصحية في مصر والعالم:
نوهنا النقطة الى فاتت عن قصة الEMRAM ... ايه بقى الموضوع ده ؟ الـ EMRAM اختصار لجملة Electronic Medical Record Adoption Model وهو النموذج اللى الHIMSS بتحاول تنشره وتعممه على المستشفيات من حيث تطبيق التكنولوجيا والاستفادة بيها في تقديم الرعاية الصحية .
مؤتمرات وزيارات وندوات وتقييمات في كل حتة لمراجعة تطبيق الموديل ده . حاجة كدة زي معايير الجودة الصحية العالمية JCI أو السعودية CBAHI بالنسبة للجودة ومتقسمة سبع مستويات اعلى مستوى اللى هو stage 7 وهو انك وصلت لسجل الكتروني متكامل جوة وبرة المستشفى وبقيت Paperless وكل العمليات بقت مميكنة. النموذج ده بقى مشهورة ومنتشر جدا والمستشفيات بقت تتسابق للحصول على الaccreditation ده وده معناه الاحتياج اكتر لناس دارسه وفاهمة وعارفة الHIMSS ومواضيعها وشهاداتها والنموذج اللى بتقدمه والCPHIMS بتساعد على كدة
3. سوق عامل واعد وينمو باستمرار:
ده بييجي اصلا مع ازدياد الطلب على المهن المتعلقة بال healthcare technology والسوق قادر يستوعب اعداد اكتر سواء في مصر او في الخليج او حتى على مستوى العالم والشهادة دي تديلك ثقة لنفسك وتدوس اكتر في المجال
4. محتوى شامل يضعك على طريق الاحتراف:
بصفة عامة في 10 مواضيع رئيسية بندرسها في الـCPHIMS منقسمة تحت 4 اقسام : Healthcare , Technology, Analysis , Design, Implementation , Testing , Security, Leadership , Management والعضو الجديد المنضم في الاصدار الأخير Clinical informatics . مواضيع متنوعة وشيقة وتفتح النفس كدة في دراستها
5. إضافة قوية مع مجال ال Clinical Informatics:
زي ما قلت حصل تغيير دراماتيكي في المنهج في الاصدار الاخير باضافة clinical informatic وده تغييير ايجابي من ناحيتين . الاولى انهم ابتدوا يدخلوا عنصر الـ know what بعد ما كانوا مركزين اكتر على الـknow how والادارة . لفترة كبيرة كنت شايف ان المنهج محتاج تعديل عشان يستوعب موضوع مهم زي ال clinical informatic يبقى داخل السياق. والثانية ان الاضافة ادت الى توزيع الدرجات وتقليل درجات من اقسام صعبة واسالتها سخيفة وبتهدر درجات فبقى الامتحان نوعا ما أسهل.
6. اجتيازك الامتحان = انت متميز
الHIMSS واضح في نقطة ان اسئلته لا تعتمد على مصدر واحد وان الهدف قياس خبرة ومهارات الممتحن وده هيخلينا نفتح اكتر من مصدر للمذاكرة والاطلاع ... ممكن تشوفها مش حاجة مميزة بس بالنسبالى دي حاجة رائعة هتطلع بكميات حلوة من الافكار والمصطلحات هتثرى خبرتك ومعرفتك المهنية
7. مدة الدراسة ليست كبيرة:
الscope والcontent بتاع الـ CPHIMS صغير نسبيا مقارنة بالشهادات المشابهة ومدة الدراسة في اسوا الاحوال من شهرين لحد 4 شهور وتقدر تلم الدنيا فيها في مقابل شهادات ودبلومات ممكن مددها تترواح بالسنين.
8. تكلفة الامتحان الدولي أقل من الدبلوم الحكومي
تكلفة الامتحان قليلة مقارنة بالشهادات المشابهة .... رسوم الامتحان 600 $ وتقدر تاخد الامتحان بخصم كمان بشروط معينة
9. شروط الامتحان سهلة
الشروط للامتحان مش صعبة ... حتى لو بعض الشروط بالنسبالك صعبة قدم وقول انها عندك ... ماحدش هيدور وراك 
10. كمان خطوات حجز الامتحان سهلة
بالاضافة للعنصر اللى فات سهولة التقديم والحجز... بسهولة تقدر تحجز الامتحان في اي وقت يناسيبك وفيه اوبشن كمان انك تمتحن من البيت بشروط معينة – متاح حتى الان ووارد انه يتشال حسب سياسات الوقاية من كوفيد - وتقدر تغير المعاد قبلها بايام بدون رسوم ولو لا قدر الله ما توفقتش تقدر تخش الامتحان بخصم النص مرة تانية ... يا بلاش!
شكرا للمشاركة