البوُسْتُ العِمْلَاق فِي إِجْرَاءاتِ الزِّيَارَةِ وَالالتِحَاقِ (إعادة نشر مع التحديث).
مقدمة: (أخر تحديث 28/1/2024)
• دي إعادة نشر للبوست مع تعديله بعد إعادة فتح الالتحاق من جديد.
• خليني أوضح أخر تحديث وصلنا وهو:
- تم فتح الالتحاق بعائل للزوجة والأبناء فقط بداية من 25/1/2024 بشروط جديدة.
- رسوم إصدار سمة الالتحاق أو الزيارة أصبحت 9 دينار.
• مراعاة إن الخطوات فيها كتير خاص بالمصريين فقط، غير المصريين هيقيسوا على نفس الإجراءات الخاصة بيهم.
.
البوست هيكون عبارة عن:
إجراءات إصدار سمة الالتحاق بعائل في الكويت.
إجراءات الالتحاق بعائل في مصر.
إجراءات عمل إقامة الالتحاق بعائل في الكويت.إجراءات إصدار سمة دخول الالتحاق بعائل في الكويت:
1- الشروط الجديدة في شرطين أساسيين، الأول إن لازم الزوج يكون راتبه 800 دينار وفوق.
لو أقل حاول تاخد استثنا من مدير إدارة الجوازات، وانت وحظك. عند التجديد مش محتاج شرط الراتب، المهم عند تقديم المعاملة أول مرة.الشرط التاني إن يكون الزوج مؤهل عالي، وكمان يكون المؤهل مطابق لمهنته (الشرط ده لسة مش واضح تماماً، هنحدث البوست بمجرد وضوح الأمور).
2- في مهن مستثناة من شرط الراتب وهى (بس عادي إنك تروح والموظف يرفض يستثنيك):
- المستشارين والقضاة وأعضاء النيابة والخبرا والباحثين القانونيين.
- الأطباء والصيادلة والممرضين والمسعفين والمهن الفنية الطبية والخدمات الاجتماعية.
للأسف الممرضات غير مسموح لهن باستقدام ابناءهن حتى لو توافر فيهن شرط الراتب.- أساتذة الجامعة والمعاهد.
- المدرسين ومدراء المدارس والموجهين والاخصائيين الاجتماعيين وأمناء المكتبات.
- المهندسين (طلبوا من صديق شهادة لمن يهمه الأمر من جمعية المهندسين الكويتية ومصدقة من الخارجية).
- الأئمة والخطباء والمؤذنين ومغسلو الموتى.
- الصحفيين والمراسلين.
- المدربين الرياضيين واللاعبين.
- الطيارين والمضيفين.
وعشان تاخد الاستثنا طبعاً لازم يكون مسماك الوظيفي مظبوط، يعني لو انت خريج هندسة بس إذن عملك مش مهندس ما ينفعش، أو تحاول تاخد استثنا.
3- الورق المطلوب هو:
- قسيمة زواج موثقة (ممكن تقابل مشكلة لو القسيمة غير مميكنة).
- المدنية أو هويتي.
- إذن العمل (شهادة راتب لو موظف حكومي).
بعض الإدارات بتطلب برنت من الحاسب الآلي (بيكون في نفس المكان) مذكور فيه المؤهل مع المهنة وعدم الاكتفاء بإذن العمل، وطبعاً مش محتاج توثيق.- صورة جواز سفر الزوجة (الجواز يكون فيه صلاحية سنتين على الأقل).
- شهادة التخرج موثقة لمقارنتها بإذن العمل (ودي ما كانتش مطلوبة قبل كدة).
4- مطلوب أصل قسيمة الجواز، ودلوقتي بيطلبوها تكون المميكنة الجديدة، مش القديمة اليدوية، وطبعاً تكون موثقة.
بس جرب تقدم القديمة لو كانت بالفعل موثقة من قبل كدة إن شاء الله تمشي.
التوثيق (لأي مستند) عبارة عن مرحلتين في مصر:
- الخارجية المصرية في مصر (الرسوم 110 جنيه وبدون حجز).
- القنصلية الكويتية في مصر (الرسوم 750 جنيه وبدون حجز، والدفع كاش).
تبعتها من مصر لهنا تتوثق تاني:
- الخارجية الكويتية هنا (الرسوم طابع بـ 5 دينار).
- الحمد لله دلوقتي مش بيطلبوا توثيق القنصلية هنا.
ولو حصل وطلبوه هيكلفك 17 دينار ودي رسوم توثيق أي ورقة عموماً.
• معايا القسيمة بس مش متوثقة من القنصلية الكويتية في مصر، تمشي؟
من خلال تجارب الناس، أكتر حاجة بيركزوا عليها توثيق القنصلية الكويتية في مصر، واللي مش موثق من القنصلية في مصر والخارجية هنا مش بيقبلوا معاملته.
عموماً قدم المعاملة كدة، لو مشيت يبقى خير، لو اترفضت حاول في يوم تاني مع موظف مختلف، وقفت برضو يبقى مفيش غير إنك تبعتها تتوثق.
• التوثيق فين في مصر، في السفارة ولا في القنصلية؟
التوثيق في القنصلية (الدقي، شارع نبيل الوقاد)، تقديم ورق معاملة الالتحاق هو اللي في السفارة (الجيزة، شارع مراد).
• التوثيق بياخد وقت قد إيه؟
توثيق الخارجية المصرية وانت واقف.
توثيق القنصلية الكويتية حوالي 3 أو 4 أيام عمل.
• ممكن واحد صحبي يوثق بدالي أي مستند من القنصلية في مصر؟
فقط مسموح للقرايب الدرجة الأولى، الأخ، الأخت، الأب، الزوجة، كدة.
5- هتحجز موعد جوازات من على "تطبيق سهل"، وتطبع الطلب وتقدمه (جرب روح من غير حجز، دلوقتي الدنيا مش زي قبل كدة، بس احجز أفضل عشان مع الزحام المتوقع ممكن يطلبوا حجز).
ممكن تستلم السمة في نفس اليوم أو تاني يوم بالكتير إن شاء الله.
الرسوم 9 دينار.
6- هتبعت الأصل مصر (مش صورة زي الزيارة).
الأفضل تبعت عن طريق الصرافات زي المزيني مقابل 7 دينار، هتاخد حوالي 4 أيام عمل وتوصل لحد البيت.
الأسرع إنك تروح المطار في وقت يكون فيه رحلات لمصر وتبعت الورق مع حد مسافر.
وهتبعت القسيمة مع سنة الدخول عشان زوجتك تكمل بيها ورقها في مصر.
• هل محتاج أوثق سمة الدخول قبل ما ابعتها؟
لأ مفيش حاجة اسمها كدة، لا هنا ولا في مصر.
7- لو بتعمل المعاملة لابنك هتقدم على معاملة التحاق زي الأم كدة، نفس الورق وتزود عليه شهادة ميلاد الطفل (موثقة الأربع توثيقات)، وصورة جواز سفره.
اللي يزيد في معاملة الأبناء إن شرط أساسي تكون الأم عندها إقامة هنا. 8- صلاحية سمة دخول الالتحاق 3 شهور من تاريخ صدورها من هنا، يعني الزوجة معاها 3 شهور تكشف وتخلص فيهم ورقها كله.
وهنا معاها شهرين من تاريخ الدخول تخلص ورقها.
وبفكرك تاني، هتبعت أصل المعاملة مش صور.9- في لغط وفهم خاطىء منتشر عن موضوع منع السفر لو الزوجة حامل.
لو الزوجة كانت جاية إقامة عمل مش هتقدر تكمل الإجراءات.
لكن لو جاية التحاق وكانت في أول 3 شهور من الحمل اللي هما بتوع تثبيت الحمل لا يُنصح إنها تكشف في مصر بسبب الإكس راي.
بعد الـ 3 شهور ممكن تعمله، لو رفضت مبتكملش كشف وبتترفض تيجي الكويت.
لو الزوجة وافقت وكانت معدية أول 3 شهور يبقى بتعمله والموضوع بيكون آمن تماماً، أولاً بيقللوا مدى أو كمية الأشعة على أقل حد خالص، وكمان بيحطوا طبقة سميكة كحمايه أثناء عمل الأشعة، وبتخلص الكشف ومفيش أي خطر على الجنين إطلاقاً لأن اللي بيعملوه دكاترة فاهمين، وبتكمل أمورها عادي جداً وبتيجي الكويت.
لما تيجي وهى بتكشف في إكس راي تاني، بيسألوها إنتي في الشهر الكام وفاضلك كام شهر وبيمضوها على ورقة انها تيجي تعمل الإكس راي بعد مدة شهرين من تاريخ الولادة المتوقع حسب مدة الحمل المتبقية.
10- لأي سبب واضطريت إنك ما تكملش إجراءات إقامة الزوجة أو الطفل وكان لازم يرجعوا مصر، هل فيها مشكلة؟
لا خالص، لأنهم يعتبر معاهم إقامة مؤقتة مدتها شهرين، فيقدروا يغادروا قبل انتهاء الشهرين بدون أي مشاكل، لا عليهم ولا عليك ككفيل.
11- كان انتشر خبر منع التحاق الأطفال فوق الخمس سنين، الكلام غير صحيح، أو فيه لبس شوية.
الأطفال تحت 5 سنين وأمهم عندها إقامة هنا مسموح يجوا بدون الشروط الجديدة، يعني لا راتب ولا مؤهل، بس هتحتاج تاخد موافقة مدير الإدارة.
12- متاح تعمل التحاق للولاد لحد سن 16 سنة والبنات لحد سن 18.
إجراءات الالتحاق بعائل في مصر.
حط في بالك احتمال يكون في تغيير في رسوم بعض المعاملات.
أولاً: بالنسبة للزوجة:20- بعد ما طلعت سمة الدخول هتبعت الأصل والقسيمة زي ما ذكرت في رقم 6.
21- باختصار عشان ابسطها عليك، هم 4 مشاوير أساسية هى:
- التحليل في المعامل المركزية (مفيش غير في القاهرة).
- الكشف الطبي (هتروح مرتين معلش مش مشوار واحد).
- قسم الشرطة عشان الفيش، ثم الخارجية لتوثيقه.
- أخيراً السفارة الكويتية.
22- هتسجل باسم الزوجة على موقع مجلس الصحة لدول مجلس التعاون، وده الرابط بتاعه:
بتكتب بيانات الزوجة وتدفع ما قيمته 10 دولار (أنت بتدفع بالكارت بالمصري عادي)، وبيتحددلك مكان الكشف، مش انت اللي بتختار، بس المهم تلتزم بالمكان وتروح في خلال مواعيد عملهم.
مش بيحدد اليوم ولكن الأفضل تروح خلال أول 3 أيام من بعد ما تحجز.
هتروح تكشف ومعاها الجواز وسمة الدخول اللي أنت بعتها.
النتيجة هتاخد حوالي أسبوعين، هتدفع وهى بتستلم 1350 جنيه.
23- هتطلع على المعامل المركزية في نفس اليوم (خصوصاً لو كنت من خارج القاهرة)
شغالين السبت من 8 صباحاً.
في ناس قالت بالحجز هتحجز موعد من الموقع ده:
لما تروح هتدفع 500 جنيه وهياخدوا العينات المطلوبة منها وتاخد إيصال.
خليها تعمل حسابها يكون معاها ڤيزا (مقصدش كريدت، أقصد ڤيزا زي الكيه نت هنا يعني) عشان ساعات بيرفضوا ياخدوا كاش.
ويكون معاها صورتين شخصيتين.
النتيجة هتاخد يمكن أسبوع، بتقدر تعرفها من موقع المعامل المركزية.
24- هتروح تعمل فيش مميكن (كمبيوتر) من قسم الشرطة اللي انتو تابعين له خلال فترة انتظار نتايج الكشف والتحاليل عشان تكسب وقت، اعتقد تكلفته دلوقتي حوالي 70 جنيه.
وتصدقه من الخارجية بـ 110 جنيه، أي فرع خارجية مش لازم فرع معين، وتوثقه قنصلية بـ 750 جنيه.
خلي بالك ما تستعجلش وتعمل الفيش بدري قبل صدور سمة الدخول من الكويت، تاريخ الفيش لازم يكون بعد تاريخ إصدار السمة، وفي نفس الوقت ما تتأخرش عشان لو حصل أي موقف بايخ من القسم يأخر الفيش ولأن توثيق القنصلية بياخد حوالي 4 أيام.
25- ممكن تعرف نتيجة التحاليل من الرابط ده:
وبمجرد ظهور نتيجة التحاليل هتروح تستلمها وتروح تسلمها في المستشفى اللي كشفت فيها، بياخدوها مع نتيجة الكشف هم يودوها السفارة، وبعد أسبوع ولا حاجة هترجع المستشفى تستلم كل الورق بتاع التحاليل والكشف وتروح تقدمه في السفارة.
والأفضل قبل ما تروح تتصل على المستشفى تتأكد هل ورقها وصل ولا لسة.
ممكن تعرف نتيجة الكشف من الرابط ده:
26- هتروح السفارة وهتاخد كل ورقها (الزوجة هتقدم بنفسها، ما ينفعش حد عنها:
حجز موعد للسفارة
- أصل وصور نتايج الكشف والتحاليل.
- الفيش بعد توثيقه من الخارجية المصرية.
- أصل وصورة سمة الدخول.
- القسيمة موثقة (مش مطلوبة بس خليها معاها احتياطي).
- الجواز أصل وصورة.
- صورة المدنية الكويتية للزوج ( أو الزوجة لو هى الكفيل).
- إيصال تسديد الرسوم:
دلوقتي تسديد الرسوم أصبح عن طريق بنك الكويت الوطني بمصر، ولازم بالدولار، قيمة الرسوم للي فوق سن 18 هى 100 دولار.
السفارة الكويتية في الجيزة، شارع مراد (السفارة مش القنصلية).
تكون هناك قبل 11 وتسلم كل ورقها.
إن شاء الله هتستلم الڤيزا اللي هتسافر بيها خلال أسبوع.
ثانياً: بالنسبة للأبناء:27- لو ابنك سنه تحت 12 سنة، لأن مالوش كشف
هتاخد الورق التالي وتقدمه في السفارة الكويتية على طول:
- أصل سمة الدخول اللي بعتها من الكويت.
- جواز الطفل أصل وصورة.
- قسيمة جوازك موثقة.
- شهادة ميلاد الطفل موثقة.
- إيصال تسديد الرسوم:
دلوقتي تسديد الرسوم أصبح عن طريق بنك الكويت الوطني بمصر، ولازم بالدولار، قيمة الرسوم للي تحت سن 18 هى 75 دولار.
وإن شاء الله تستلم الڤيزا خلال أسبوع.
لو سن الطفل فوق 12 سنة هتعمل نفس الخطوات من رقم 20 لرقم 26.
إجراءات عمل إقامة الالتحاق بعائل في الكويت:
أولاً: بالنسبة للزوجة:
30- بمجرد وصول الزوجة هتحتاج توثق أي ورق رسمي ما كانش موثق بالكامل، القسيمة طبعاً خلاص موثقة لأنك استخدمتها قبل كدة هنا وانت بتطلع سمة الدخول.
هتحتاج دلوقتي توثق الفيش اللي زوجتك عملته في مصر، قنصلية مصرية الأول ثم خارجية (ممكن تتغاضى عن توثيق القنصلية المصرية).
وخليك جاهز بإنك تحجز موعد قنصلية من بدري، حتى من قبل ما تكون عملت سمة الدخول من هنا لأن في تأخير في المواعيد، الخارجية ما فيهاش المشلكة دي لأن مفيش حجز خلاص.
من تجارب البعض إنهم ممكن ما يسألوش عن توثيق القنصلية المصرية هنا، المهم توثيق القنصلية الكويتية في مصر والخارجية الكويتية هنا.
31- هتطبع ورق معاملة الإقامة لأول مرة والبصمات والكشف الطبي، لما تقول للطباع هو هيطبعلك كل الورق اللي هتحتاجه.
32- هتروح على البصمات على حسب منطقتك، ولازم تكون حاجز موعد من الداخلية من على تطبيق سهل.
المفروض النتيجة بتاخد يمكن أسبوع ومش محتاج ترجع تاخدها، هى بتتحفظ على اسم الزوجة على سيستم الداخلية.
ده موقع بصمات مشرف:
موقع جوازات الأحمدي:
موقع بصمات الأحمدي:
موقع بصمات الفروانية:
33- بعدها هتطلع علي مستشفى الصباح، لازم تحجز، المرة دي الحجز من موقع وزارة الصحة من الرابط ده:
هتقدم الورق هناك، ومعاه طابع بـ 10 دينار.
هتاخد الورق وتروح تعمل تحليل الدم.
هتخلص تروح تعمل أشعة الصدر، وكل ده في نفس المكان.
النتيجة برضو هتتحفظ على سيستم الداخلية، ودي ممكن تاخد حوالي 10 أيام.
هتدخل على تطبيق سهل" تشوف نتيجة الكشف الطبي وصلت وزارة الداخلية ولا لأ، هتختار "خدمات" ثم تختار "وزارة الداخلية" ثم تختار "خدمات استعلامية" ثم "استعلام نتيجة الفحص الطبي للمقيم".
موقع مستشفى الصباح على جوجل مابس:
34- هتدفع التأمين أونلاين 40 دينار من الرابط ده:
وتطبع الإيصال وتضيفه لباقي ورقها.
لو دي أول مرة ليك فمحتاج عشان تدفع التأمين إنك تعمل حساب على موقع التأمين، وياريت تحتفط باليوزر والباسورد لأن دول اللي هتستخدمهم على طول لدفع التأمين كل سنة لكل اللي على كفالتك (تقدر برضو تدفعهم عند الطباعين).
35- هتروح علي الجوازات بالورق كله وتاخد موافقة (برضو يُفضل تكون حاجز).
هيبلغوك تروح تاخد برنت من الحاسب الآلي عشان الاسم اللاتيني، ولازم تتأكد إن الاسم العربي واللاتيني ورقم الجواز وتاريخ الميلاد مطابقين للجواز.
احتفظ بالبرنت ده عشان لو حصل ولقيت خطأ في بيانات المدنية بعد كدة.
36- الاسم العربي لو خماسي في الجواز عادي إنك تلاقيهم كاتبين 4 أسماء فقط، غالباً بيشيلوا الاسم الرابع، المهم الاسم الأول والأخير مطابقين للجواز.
الاسم اللاتيني أهم حاجة فيه الاسم الأول والأخير، وممكن تلاقي الاسماء اللي في النص مكتوبة اختصارات أول حرف فقط.
37- هتروح علي التحصيل وتدفع 100 دينار وهتاخد إيصال بالمبلغ، احتفظ بيه.
هتدخل تقدم الورق كامل (بما فيه أصل الڤيزا اللي الزوجة دخلت بيها والفيش وإيصال التأمين).
المفروض هيوصلك رسالة إن الإقامة خلاص تمام، ابدأ في إصدار المدنية.
38- هتدخل موقع المدنية أونلاين من الرابط ده:
وترفع التالي:
- صورة شخصية للزوحة بخلفية زرقا.
- صورة جواز الزوجة.
- صورة جوازك.
- هتحدد فصيلة الدم وترفق ورقة بفصيلة الدم بتعملها من المستوصف.
- إيصال ورقة الإقامة اللي استلمته من الجوازات.
39- بعد حوالي 4 أيام تقريباً هتوصلك رسالة عشان تدفع فلوس المدنية 5 دينار عشان تكمل الإجراءات.
امتى بقى المدنية هتخلص مش عارفين اليومين دول.
40- لما تجهز المدنية هتروح جنوب السرة، هتدخل الصالة اللي ع اليمين، وهتاخد رقم وتدخل بعد كده للموظف يديلك كارت تستلم بيه البطاقة من الماكينة.
ثانياً: بالنسبة للأطفال.
41- بتطبع معاملة تحويل الزيارة وطلب كشف طبي، مش محتاج طلب للبصمة لأن الطفل مالوش بصمات.
تحجز وتروح ويكون طبعاً معاك كل ورقك.
هيقولك روح للحاسب الآلي اطلب الرقم المدني، تقدم عليه وتمشي، والطلب ده هياخد حوالي يومين.
بعد يومين تلاتة هتروح تاني، هيطبعولك الرقم المدني.
مش محتاج إن الطفل يكون معاك في المشوار ده.
42- تحجز للكشف زي ما ذكرت في رقم 33، بتاخد الطفل وتروح الكشف بالطلب اللي طبعته قبل كدة وبتجيب طابع بـ 10 دينار أو 20 مش متأكد، وتنتظروا الدور ويكشف.
43- لو ابنك لسة في سن التطعيم لازم يكون معاك حاجة من اتنين، يا إما شهادة الميلاد المصرية اليدوية وعليها التطعيمات اللي خدها في مصر، أو يكون معاك دفتر التطعيمات اللي بيصرفوه في مصر للمواليد وبيسجلوا فيه التطعيمات.
شهادة الميلاد اليدوية أو الدفتر مش لازم يكونوا موثقين من مصر زي ما البعض بيقول، لأنك هتستخدمهم فقط في موضوع التطعيمات، الشهادة التانية الكمبيوتر اللي استخدمتها من البداية هى اللي طبعاً بتكون موثقة.
وجود الشهادة مش مؤثر على إجراءات الإقامة، ولكنك محتاجها عشان تعرف تكمل التطعيمات هنا.
44- هتعمل الخطوات من رقم 38 لرقم 40. مع بعض الاختلافات البسيطة زي:
- انك بتضيف شهادة ميلاد الطفل وانت بتعمل المدنية.
- رسوم التأمين للطفل 30 دينار مش 40.
- مش بتحتاج ترفع صورة للمدنية لو ابنك تحت الخمس سنين.
- لو ابنك تحت الخمس سنين مالوش هويتي.
اللي عنده سؤال ياريت يكون قرا البوست الأول كويس، ولو في نقطة مش واضحة يسأل في التعليقات لأني مش هقدر أرد على رسايل الخاص خصوصاً لو سؤال جوابه موجود في البوست. جزيل الشكر لكل اللي ساهم معايا في نشر البوست ده، أو اللي قاموا بمراجعته معايا.أي توفيق فهو توفيق من الله، وأي خطأ أو سهو فهو مني.
الرجاء من الصفحات اللي بتنقل البوست تحفظلنا بحقنا وتذكر المصدر.الموضوع منقول عن جروب Kuwait Insiders
شكرا للمشاركة