البوست الاصلي نشر في ٢١ يناير ٢٠١٥
انا في البوست ده هاعرض أشهر طرق النصب اللي بتواجهنا في الصيدليات عشان الزملاء ياخدوا بالهم ومايقعوش فيها تاني.... وعلى فكره.. كلها من تجارب شخصيه مريت بيها في الصيدليه وهااستعرضها عليكم وهاقولكم ازاي نتفاداها على قد ما نقدر عشان الفايده تعم:
1-الفلوس المزوره: طبعا دي أكثر حاجه بتعدي علينا وياما كثير مننا لبسها زي الشاطر ويقعد يعيط جانبيها ويبروزها ويعلقها في مكان واضح عشان ياخد باله وبرضه بيلبسها تاني زي الشاطر.
-طيب الحل: الفلوس المزوره بتكون بهتانه وملمس الورقه مختلف والعلامه المائيه مختلفه... غير كل ده بأه لو مش هاتقدر تعرفها بالنظر: فيه قلم بيتباع وبدأ ينتشر في المكتبات والمحلات.. وهو قلم فلوماستر بيكشف الفلوس المزوره... القلم ده يا حلو زي اللبان السحري اللي كنا بنمضغه زمان .. لما بتجربه على فلوس سليمه بيكتب شفاف من غير لون.. بس لما تجربه على الفلوس المزوره بيكتب أسود ... هات القلم ده بيتباع ب 15 جنيه.... وخليه في درج الفلوس.. أي ورقه نقديه تشك فيها ...اكتب عليها... وبكده هاتقدر تكتشف اي فلوس مزوره شاكك فيها...
2- تاني حركه مشهوره وحصلت معايا كثيييير اللي يغالطك في الفلوس: بمعنى واحد يدخل لك ب 200 ج ويشتري منك علبه كريم شعر ب 5 جنيه... وياخد منك الباقي ويلف بسرعه ويديك ضهره ويتأهب انه يمشي... ويلف تاني في مكانه يقولك الباقي ناقص 100 جنيه... ويوريهالك قدامك ويدربكك ويشكك في نفسك.. طبعا هو في اللحظه اللي لف فيها دي خبى الل 100 جنيه بخفه يد رهيبه في كمه ولا اي حته في جسمه مش موضوعنا... المهم هايقولك انا واقف قدامك اهو وانت مديني الفلوس ناقصه وهو بيتكلم بكل ثقه هايخليك تشك في نفسك وتتبرجل وزي الاهبل زي ما انا كنتا باعمل واديله ال 100 ج على طول ..
طيب حلها ايه دي؟؟؟
-خدها قاعده: أي حد يديلك فلوس كبيره .... عد له الباقي: بمعنى واحد اشتري علبه كريم ب 5 جنيه ودفع لك 200 جنيه,, يبقى الباقي بتاعه 195 جنيه... ماتديهملوش في ايده وانت ساكت كده لأ... عدهم له ورقه ورقه وبكده لو انت غلطان فعلا في الباقي هاتكتشف غلطتك.. ولو هو عايز يغالطك مش هايقدر لأن الفلوس معدوده قدامه
3. تالت اشهر طريقه انا اتعرضت ليها بتاع 8 او 9 مرات في وجود صيادله مختلفين : - ان حد هايتصل يطلب اوردر ديلفري كبير ب 800 او 900 جنيه وهايديك عنوان شقه غالبا مقفوله او مش مسكونه.... طبعا انت زي الباشا المبتديء والتلميذ والزبون اللقطه... هاتفرح بالاوردر الكبير وتطلع تحضره جري .... الولد المسكين بتاع الديلفري هايوصل للعنوان هايلاقي الراجل مستنيه قدام باب الشقه وهايزعقله عشان يدربكه ويقوله انت اتأخرت ليه وكلمتين كده ...وياخد من الاوردر ويديله روشته ويزعق له يقوله خللي الدكتور يصرف لي الروشته دي ويعمل لي الحساب كله مره واحده وماينساش الخصم... وطبعا الديلفري الغلبان هايرجع زي العبيط الصيدليه عشان يصرف الروشته والتاني هايكون فلسع بالعلاج...
الحل: - تلبسها للديلفري وش ...وانت ذنبك ايه انه عبيط!!.. بس المصيبه انهم بيصعبوا عليك فبتضطر تشيلها انت زي الشاطر في الاخر بعد ما هايعقد يعيطلك ويقولك انا غلبان ومعيش فلوس
4- النصبايه دي باه حصلت معايا مرتين : كنت عامل اعلان في الوسيط مطلوب صيادله لان الدكطره بتاعه شيفت الصبح هاتتجوز وهاتتستت تقعد في البيت وبندور على حد مكانها .. المهم اتصل بيا واحد عرفني بنفسه انه خبره من 5 سنين خريج صيدله الزقازيق وشغال شيفت بالليل وعايز يشتغل شيفت صباحي ...وسألني انت بتروح الصيدليه الساعه كام.. قلت له باروح الساعه 3 العصر ...فقالي خلاص انا هاجيلك الساعه 3 ان شاء الله... لقيتهم في الصيدليه بيكلموني الساعه 1 الظهر وبيقولولي ان فيه صيدلي جاي على الاعلان وقال انه كلمني ومعاه ميعاد الساعه 1 بس هو جاي من بعيد فهيستناني.. فقلتلهم اوكيه خلوه يستنى..وبعد ما قفلوا معايا قالهم انه اتفق معايا انه خلاص هايشتغل معانا وعايزهم يعرفوه على اماكن الدوا في الصيدليه ويشرحوله الصيدليه وترتيب واماكن الدوا... وطبعا على حظي دخل ساعتها زحمه والدكتوره انشغلت مع الزباين وهو مارس هواياته في السرقه وقلب علبه لانتوس ب 400 جنيه وعلبتين بلافيكس ,,, وبعديها قال للدكتوره انه حاس انه وصل بدري هايروح يصلي الظهر في المسجد ويريح شويه ويرجع ع الساعه 3 ... هي شكت فيه الصراحه واول ما مشي بصت على البلافيكس اول صنف غالي يتبادر في ذهن الصيدلي على طول ولقيته ناقص علبتين.,... في ساعتها الشباب اللي شغالين طلعوا جري وراه واخدوا شباب المنطقه معاهم وجابوا من قفاه وربطوه في شجره قدام الصدليه وكل اللي رايح واللي جاي نزل ضرب فيه وكسروله أسنانه كلها وقلعوه هدومه ولقوه مخبي في الجاكت علبتين البلافيكس وعلبه اللانتوس ... وطلعوا محفظته والمفاجئه انه دبلوم ولا هو صيدلي ولا حتى حصل ممرض بيطري في مستشفى الكلب... طبعا على بال ما انا وصلت كان شباب المنطقه قلبوه في موبايله وجاكتته ومحفظته وخلوه يمشى بعد ما اكل العلقه التمام وصف اسنانه كلها وقع بدون مبالغه ووشه كله كان دم...
- طيب حل الموضوع ده اي؟؟؟ اكيد مش محتاجه فلسفه ولا مخ عظبم ان أي حد عايز يشتغل وجاي من اعلان وانت ماتعرفهوش ..يبقى أول حاجه تشوف بطاقته والكارنيه بتاعه وماتبقاش زبون زيي انا كده ويتضحك عليك بسرعه
5- الطريقه الخامسه هي الدينار الكويتي : هايجيلك واحد يطلب منك حاجات بحوالي 50ج ا... ويديلك ورقه ب 20دينار كويتي .. طبعا الدينار الكويتي ده يساوي دلوقتي 25 جنيه,,, يعني 20دينار يطلعوا كده بالصلى ع النبي 500جنيه,,, هو بأه هايغريك ...هايقولك ال 20 دينار دول بحوالي 500 جنيه بس انا مستعجل وطالع ع المطار ومش معايا مصري,,, احسبهم بحوالي 400 جنيه وشوف حسابي كام واديني المصري... طبعا انت هاتعمل فيها فتك وفلحوس وأذكى اخواتك وهاتمسك الدينار الكويتي ده تشوفه سليم ولا مضروب ,,, وفي الحقيقه هو فعلا سليم ومش مزور وعليه علامه مائيه وعلامه سريه وكل حاجه صاغ سليم...بس للأسف هي عمله قديمه قبل حرب العراق والكويت وملغيه ومالهاش قيمه وغير معترف بيها... وانت يا معلم لبست ورقه او ورقتين من ام 20دينار وزي الشاطر اديته بضاعه وفوقيها فلوس كمان ومبلغ محترم ممكن يوصل ل 1000جنيه,,, عشان تحرم تعمل فيها فلحوس وتطمع,,,
الخلاصه: ماتخدش فلوس بلد عمرك ما مسكتها قبل كده... عشان زعلها وحش...
6-الطريقه اللي بعد كده : اسلوب التلاجه بايظه.. مع انها مش بايظه: هايدخل واحد الصيدليه في شيفت غير شيفت صاحب الصيدليه ... ويعمل نفسه بيكلمك وطبعا عارف اسمك ويدخل وانت مش موجود ويتكلم في الموبايل ويقول ايوه يا دكتور احمد انا في الصيدليه اهو... بتقولي التلاجه مش بتسقع كويس؟؟ لا حاضر من عينيا هابص لك عليها... وبعد ما يخلص التليفون ال fake بتاعه يقول للصيدلي التلميذ انه كلمني وانا عايزه يشوف التلاجه اللي مش بتسقع كويس... وطبعا بيدخل يبص ع التلاجه ويقول للولد الاسيستانت روح اشتريلي ترموستات من اي حته ويقول للدكتوره هاتي كيس بلاستيك عشان هافضي التلاجه عشان هاسيح التلج...وطبعا مش هاكمل لك الباقي...بس الراجل ده لحظه انه لما دخل وقال للدكتوره انه بيكلمني ... كانت هي بتكلمني في نفس الوقت وطبعا هرشت الفيلم وزحلقناه... واكتشفنا انها اتعملت في صيدليه بعدينا في نفس اليوم وقلب التلاجه كلها ....
الفايده: حاجه زي كده لازم تتصل بصاحب الصيدليه ..ماتخدش كلام راجل ماتعرفهوش على انه كلام ثقه وانه صادق...
7- طريقه بقييت قديمه وقلت استخدامها جدا بس بيعملها الحراميه والنصابين المبتدأين: الا وهي انه يسرق حاجه ويستغفلك من غير ما تاخد بالك.. ويرجع بعديها بكام يوم يقولك انا اشتريت الدوا ده من عندك من يومين ومش عايزه وعايز أرجعه...وطبعا تراجع مبيعاتك من الكمبيوتر تلاقي نفسك مش بايعه... وطبعا لو رجعته يبقى اانت كده اتسرقت مرتين...
طب والحل يا منعم؟؟ الحل يا صديقي الدكتور العزيز انك تطلع ريسيت مع اي حاجه تتباع من عندك وان المرتجعات لازم تتم عن طريق الريسيت ده ...لو مفيش ريسيت مفيش مرتجعات
انا كده تقريبا قلت اشهر حاجات مرت عليا
اتمنى تكونوا استفدتوا منها
شكرا للمشاركة