ايه رايك يا دكتور تسجلي صاحب و نفتح صيدلية ؟
صيادلة كتير بيتعرض عليهم موضوع تسجيل الصاحب
بمعنى أن شخص ما سواء صيدلى او غير صيدلى او حتى احدى سلاسل الصيدليات محتاج يرخص باسمك صيدلية فى مكان ما
اغلب الصيادلة ( بالذات حديثي التخرج ) بيسالوا على جروبات المهنة بحسن نية لأنهم مش فاهمين حيثيات الموضوع
من غير ماتتقلب لخناقة وصراع و جدال ممكن نفهم مع بعض سلبيات وايجابيات
الموضوع دا
( قال ايجابيات قال)
ツ
١ - هتسجل صاحب يعنى اسمك هيبقى على يافطة الصيدلية من برا و لو لسلسلة هيبقي بخط صغير حقير كده
٢ - عقد ايجار المكان وعدادات المياه والكهرباء والضرائب والتأمينات والسجل التجارى وجميع الاوراق اللى هتمشى فى إجراءاتها هتكون باسمك وبالتالى امام القانون حضرتك مسؤول عنها مسؤولية كاملة
٣ - من ضمن الاجراءات في الترخيص موافقة النقابة الفرعية علي الترخيص و شهادة قيد بالنقابة بتطلع من النقابة العامة
و رغم ان كان فيه قرار وزاري من فترة خلاها مش الزامية بشكل قاطع
الا ان القرار ده تم الطعن عليه و هترجع الزامية تاني
النقابة فيها لجنة دورها تتحري عن الموضوع و لو في بلد صغيرة بالذات سهل جدا يتعرف مين صاحب الصيدلية الاصلي ..
وقتها سيادتك معرض للتحقيق و الاحالة للتأديب في النقابة و انت و نصيبك بقي
٤ - بنسبه كبيرة هيتطلب منك عمل توكيل غير قابل للالغاء الا بحضور الطرفين
التوكيل ده بيتيح للشخص الي انت عامله التوكيل انه يخلص أي اجراء مكانك
لكن برضو حضرتك المسئول عن الصيدلية لانك انت صاحب الصيدلية
ولو بايع اسمك لواحد مش صيدلى يبقى وديت نفسك فى داهية من بابه
و اسمع بقي قصص و حكايات عن مشاكل التوكيلات
٥ - بعد مالصيدلية تفتح وتبدأ تمارس عمل حضرتك مسؤول عن كل كبيرة وصغيرة فيها (لو شغالة بدون مدير / الصاحب يعتبر مسئول مع المدير عن المخالفات)
٦ - المدير مش مسؤول عن كل حاجة فى الصيدلية زى ما اغلب الصيادلة فاكرين
المدير هو مسئول عن المخالفات الفنية
اى تعاملات مادية سواء ضرائب او تامينات او سحب من الشركات هو ملوش اى علاقة بيها
المدير نفسه لو اتعمله محضر حضرتك هتبقى مشترك معاه فيه برده
٧ - لو حصل اى مشكلة فى الصيدلية وحابب تمشى مش بيبقى بسهولة
المدير ممكن يروح الادارة يترك او يطلع على اقرب مكتب بريد يبعت جواب ترك مسجل بعلم الوصول وكدا قصته تبقى خلصت
الصاحب مختلف اما هتروح تقدم طلب للإدارة لالغاء الترخيص ودا بياخد وقت او هتجيب صيدلى تانى تعمله تنازل عن الترخيص ودا بياخد وقت اطول واوراق كتير جدا
و المفروض يكون تحت ايدك الدفاتر و اصل الرخصة و الرسم الهندسي عشان تلغي او تنقل الترخيص
(و انت فعليا مفيش حاجة تحت ايدك )
٨ - مفيش شخص هيدفع مبلغ وقدره ويعملك كل حاجة باسمك فى الصيدلية وهيسيبك ويمشى ممكن انت تصحى الصبح تبيع الصيدلية والترخيص وهو ملوش عندك حاجة
فى الحالة دى صاحب المكان بيكتب عليك وصل أمانة على بياض او كذا شيك بقيمة اللى اندفع فى التجهيزات والتشطيب
او تمضي علي اي ورق عشان يضمن هو حقه
٩ - راتب الصاحب اقل بكتير من راتب المدير ملاليم حرفيا
بعت رخيص اوي
أبيع نفسى لاول مشترى اتى
ابيع مقهورا حبيباتى كلماتى
فليسقط الشعر ولتنهار أبياتى
فالشعر شعرى والمأساة مأساتي
١٠ -لازم تاخد بالك أن اللى هترخصله سواء صيدلى او غير صيدلى لو سحب من شركات الأدوية ولم يتم التسديد ممكن توصل لتشميع الصيدلية و الحجز عليها وحكم غيابى عليك بدون ماتعرف ونفس الشيء فى الضرائب والتأمينات
جهات معينة ليها حق الحجز الإداري
زي الشركة المصرية لتجارة الادوية مثلا
اقرأ أيضا
١١ - مفيش حد يقولك انا بس هاخد اسمك احجز مكان والصيدلية هتفضل مقفولة لحد ما فلان الفلاني قريبى يتخرج وهنقلها باسمه وافتح
ويفضل يحلفلك بكل الميتين والصاحيين انها مش هتتفتح
بعد شوية هيستخسر اللى دفعها ويستخسر قفلتها وهيفتحها ويشتغل وانت ولا عارف حاجة
فى النهاية الموضوع مش مستاهل المجازفة لا لصيدلى ولا لغير صيدلى
الايجابيات ملاليم و المخاطر أكتر بكتير
اقرأ أيضا
شكرا للمشاركة