الاحدث

رسالة من صيدلى الى المريض المصرى .. مقال هزلى


سيادة المريض المصري...

تحية طيبة وبعد

نحيط سيادتكم علماً بأن ٩٩.٩٩℅ من اقراص منع الحمل بح... فينيتو... مبقاش 

ينزل خلاص

كما نبشر حضراتكم بنقص حاد في الالبان المدعمة والانسولين المدعم واي حاجة 

فيها ريحة الدعم 

آه... والأدوية المستوردة اللي كانت بتنزل رسمي كلها تقريباً بخ خلاص شطبنا

واللي بينزل منها تهريب مضروب

كما نوافيكم بالمستجدات من نقص حاد في أعداد كبيرة من الادوية المتنوعة

والمفاجأة المنتظرة...

‫#‏البديل‬ اللي كنتوا معتبرينه سم قاتل عشان الدكتور الفلاني اللي واخد رشوة من 

الشركة العلانية عشان يكتبلهم الدوا بتاعهم وييجي يوسوس في ودنك قبل ما تنزل بـ 

"إوعى الصيدلي الوحش يضحك عليك ويديك البديل" أهو ولا الدوا نفسه ولا المثيل 

ولا البديل بقوا موجودين

حضرتك تاخد توكتوك محترم كدة وتلف على اجزخانات البلد كلها اجزخانة اجزخانة 

وفي ايدك الروشتة وكل صيدلية تدخلها تروح للصيدلي كدة بكل احترام وتقوله لو 

سمحت عايز الدوا ده او اللي زيه حضرتك

ولو لقيت الدوا او المثيل او البديل او ابو زلومة حتى يبقى تبوس ايدك وش وضهر

 وتسجد سجدة شكر وتاخد الصيدلي بالحضن وتبوس دماغه وتحاسب وتروح متبوعاً 

بزفة حسب الله وكهارب من اول الشارع

ولو في الاستشارة الدكتور قالك مجبتش اللي كاتبه بالظبط هو هو بتاع الشركة دي

 ليه اديله الروشتة وتمن العلاج واجرة التوكتوك وخليه يجيبه هو واقعد خللي بالك 

من العيادة على ما ييجي إذا جه تاني

*نصيحة: حافظ على عينيك اليومين دول...

٣/٤ القطرات مبتنزلش ومراهم العين كلها ما عدا صنفين اتنين بس تعيش انت

ومفيش عزا عشان التقشف

ما انت لازم تتقشف عشان مصر

لأ وخد الكبيرة بقى...

مفيش في الصيدليات ولا المستشفيات لا محلول ملح ولا محلول سكر اللي هما شوية

 مية على معلقة ملح ولا معلقة جلوكوز ويتقلبوا ويتعقموا وخلاص والشركات 

بتبيعهم 

سوق سودة الواحدة ممكن تعدي الـ١٢ج بدل ٤.٥ج ده لو لقيتها وبالواسطة كمان

يعني اللي يعمل حادثة دلوقتي يتعلقله عرقسوس وخروب بدل المحاليل
.
واوعاك فاكر أن الصيدلي هو اللي مكسل يطلب دواك انت بالذات من الشركة في 

الـ٣-٤ مرات اللي بيطلبهم فيها كل يوم...

القصة ان مفيش عملة صعبة عشان الشركات تشتري بيها الخامات اللي تصنع بيها الادوية



مشاركة من صيدلى :محمد زايد





حجم الخط
+
16
-
تباعد السطور
+
2
-